سر صادق خان لندن کے موجودہ مئیر ہیں اور سیاست، شہرت، سماجی انصاف اور ماحولیات کے میدان میں ایک فعال کردار ادا کرتے آئے ہیں۔ سرصادق خان پاکستان سے برطانیہ آنے والے والدین کے یہاں پیدا ہوئے اور ایک عام خاندان میں پرورش پائی۔جس نے ان کی شخصیت اور وژن پر گہرا اثر چھوڑا۔

حال ہی میں امریکی صدر ڈونلڈ ٹرمپ جب لندن آئے تھے تو انہیں عام لوگوں کے احتجاج سے دور رکھنے کے لیے ان کے بیشتر پروگرام کو خاص بنا کر مکمل کیا گیا۔ تاہم مجھے لگتا ہے کہ ڈونلڈ ٹرمپ انگلینڈ کے دورے سے خوش نہیں تھے اور جس کا نتیجہ یہ دیکھنے کو آیا جب ڈونلڈ ٹرمپ نیو یارک میں اقوام متحدہ کی جنرل اسمبلی سے خطاب کرتے ہوئے کہا کہ ’ لندن کا ایک خوفناک، خوفناک مئیر ہے جس نے لندن میں شریعت قانون نافذ کر دیا ہے‘۔ جس کے جواب میں سر صادق خان نے کہا ہے کہ ڈونلڈ ٹرمپ نے اقوام متحدہ میں ظاہر کیا ہے کہ وہ ’نسل پرست، جنس پرست، بد انتظامی اور اسلامک فوبک ‘ہیں۔ سر صادق خان نے یہ بھی کہا کہ’ لوگ حیران ہیں کہ ٹرمپ نے اس مسلمان مئیر کے بارے میں کہا ہے جو ایک لبرل، کثیرثقافتی، ترقی پسند اور کامیاب شہر کی قیادت کر تا ہے، اس کا مطلب یہ ہے کہ میں ڈونلڈ ٹرمپ کے دماغ کے اندر کرائے کے بغیر زندگی گزار رہا ہوں‘۔انہوں نے مزید کہا ’ میرے خیال میں صدر ٹرمپ نے ظاہر کیا ہے کہ وہ نسل پرست ہیں، وہ جنس پرست ہیں، وہ بد سلوکی پر مبنی ہیں اور وہ اسلامو فوبک ہیں‘۔

سر صادق خان نے ٹرمپ کی باتوں پر بیان دیتے ہوئے مزید کہا کہ جب لوگ باتیں کہتے ہیں، جب لوگ ایک خاص طریقے سے کام کرتے ہیں۔ جب لوگ ایک خاص طریقے سے برتاؤ کرتے ہیں، تو آپ کو ان پر یقین کرنا پڑے گا، انہوں نے یہ بھی کہا کہ’ شکر ہیں کہ ہمارے پاس ریکارڈ تعداد میں امریکی لندن آرہے ہیں‘۔ اس کے علاوہ مختلف معیارات سے ظاہر ہوتا ہے کہ ثقافت کے حوالے سے لندن اکثر دنیا کا نمبر ایک شہر ہوتا ہے۔

یہ پہلا موقع نہیں جب امریکی صدر ٹرمپ نے سر صادق خان کو نشانہ بنایاہو۔ 2019میں انہوں نے لندن کے مئیر کو، جو 2024 میں تیسری مدت کے لیے دوبارہ منتخب ہوئے، سر صادق خان کو نشانہ بنایا تھا۔ اس کے علاوہ ماضی میں ٹرمپ نے سر صادق خان کو آئی کیو ٹیسٹ کا چیلنج دیا تھا اور 2017میں لندن برج حملے پر ان کے رد عمل پر تنقید کی تھی۔اسکاٹ لینڈ کے دورے کے دوران ٹرمپ نے سر صادق خان کو ’ ایک گندا شخص کہا، جس نے خوفناک کام کیا‘۔ان باتوں کے علاوہ لندن کے میئر سرصادق خان نے یہ کہہ کر سبھی کو حیران کر دیا کہ’جب امریکی صدر لندن آئے گے تو وہ ان سے ضرور ملاقات کریں گے‘۔

صادق خان نے یہ بھی کہا کہ’وہ امریکی صدر ڈونالڈ ٹرمپ کو یہ دکھانا چاہتے ہیں کہ لندن میں بسے ہرعقیدے کے لوگ ایک دوسرے کا احترام کرتے ہیں،اس کے ساتھ جشن مناتے ہیں اوراسے گلے لگاتے ہیں‘۔ ظاہر سی بات ہے کہ صادق خان کے اس بیان سے لوگوں کو جہاں حیرانی ہوئی تو وہیں انہیں سر صادق خان کے اخلاقی جرات سے خوشی بھی ہوئی ہے۔ دراصل سرصادق خان جب سے لندن کے مئیر منتخب ہوئے ہیں امریکی صدر ڈونالڈ ٹرمپ ٹویٹ کے ذریعہ ان کو نشانہ بناتے رہے ہیں۔ جس سے ایک بات تو صاف طور پر پتہ چلتی ہے کہ ڈونالڈ ٹرمپ کو شاید لندن کا ایک مسلم مئیر ہضم نہیں ہورہا ہے۔ ورنہ سر صادق خان میں ایسی کون سی خرابی ہے جس سے امریکی صدر ڈونالڈ ٹرمپ مسلسل ان کے خلاف طنزیہ اور مضحکہ خیز ٹویٹ اور بیان بازی کرتے رہتے ہیں۔

لندن برِج اور بورو مارکیٹ کے حملے کے بعد سرصادق خان نے اپنے بیان میں کہا تھا کہ’لندن کے لوگوں کو ان بزدلانہ حملوں سے خوف نہیں کھانا چاہئے بلکہ وہ اپنی معمول زندگی کو جاری رکھیں۔ اس کے علاوہ راستوں میں پولیس کی موجودگی سے انہیں گھبرانا نہیں چاہئے‘۔جس سے بوکھلا کر ڈونالڈ ٹرمپ نے فوراً اس کے جواب میں ٹویٹ کیا کہ ’سرصادق خان کا بیان ایک شدید ناکامی والا بیان ہے جسے انہیں اس کی وضاحت کرنی چاہئے‘۔ دسمبر 2015میں ڈونالڈ ٹرمپ نے کیلیفورنیا میں چلی گولی کے بعد کہا تھا کہ امریکہ میں مسلمانوں کے داخلے پر پابندی لگا دینی چاہئے۔ 2016میں جب صادق خان لندن کے مئیر منتخب ہوئے تو ڈونالڈ ٹرمپ سے پوچھا گیا کہ ’کیا وہ صادق خان کو امریکہ آنے پر پابندی لگائے گے‘۔تو انہوں نے جواب دیا کہ ’پابندی میں رعایت کی گنجائش ہو سکتی ہے‘۔ لیکن مئیرسر صادق خان نے ٹرمپ کی باتوں کو مسترد کرتے ہوئے کہا تھا کہ ’میں رعایت کی صورت میں امریکہ نہیں جاؤں گا۔یہ بات صرف میرے لئے نہیں بلکہ میرے دوست، رشتے دار اور دنیا کے تمام لوگوں کے لئے اہم ہے‘۔